„Ég held að verk mín séu misskilin,“ segir Nick Turner sem fór að venja komur sínar til Íslands árið 2011. „Þetta snýst ekki bara um mig að hlaupa nakinn með hestum. Langt í frá.“

Nick er myndlistarmaður og sinnir einnig mörgum öðrum listgreinum. Að hlaupa nakinn í náttúrunni með hestum er eitt af verkum hans, að hann verði einn af þeim, hluti af náttúrunni. Segir hann að maðurinn eigi margt sameiginlegt með dýrum. Vice, fjallar um veru Turner á Íslandi.

Turner kveðst strax í æsku hafa liðið vel í náttúrunni og á meðal dýra. Þá hafi hann tekið félagsskap hesta fram yfir skólafélaga sem barn. Segir Turner að ein ástæða þess að hann hafi skapað myndaseríuna hafi verið tilraun til að reyna að skilja af hverju hann hafi upplifað sig utangarðs þegar hann var að alast upp.

„Mig langaði að verða hluti af hópnum, einn af hestunum, ekki bara maður sem stendur við hliðina á þeim.“

Turner segir frá því þegar hann ferðaðist fyrst til Íslands árið 2011. Síðan þá hefur hann tekið ástfóstri við land og þjóð. Og auðvitað heillast af íslenska hestinum líkt og sést á myndum. Í viðtalinu segir að 60% Íslendinga trúi á yfirnáttúruleg öfl og heillaði það listamanninn.

„Ég bjó yfir miklu ímyndunarafli sem barn og las bækur um ævintýri og galdra,“ segir Turner og bætir við að þess vegna höfði Ísland einnig sérstaklega til hans. Þá segir Turner á öðrum stað:

„Ég vil að áhorfandinn finni eitthvað þegar hann horfir á verk mín, ekki bara að það heilli hann eða honum finnist það forvitnilegt, það er einnig mikilvægt að hann átti sig á margbreytileika náttúrunnar og mikilvægi hennar og hvernig náttúran hefur áhrif á samfélag okkar í dag.“

[youtube https://www.youtube.com/watch?v=KASxRjTee0A&w=660&h=415]