„Illugi Gunnarsson rak heila kosningabaráttu fyrir Sjálfstæðisflokkinn 2009 sem gekk út á að taka upp evruna með önfirskum göldrum án þess að ganga í ESB.“
Þetta segir Össur Skarphéðinsson um þriggja manna verkefnisstjórn sem nýverið var skipuð. Er henni ætlað að endurmeta íslenska peningastefnu. Bjarni Benediktsson forsætisráðherra skipaði stjórnina en ekki frændi hans Benedikt. Málefni Seðlabankans voru færð frá fjármálaráðuneyti til Bjarna skömmu eftir áramót. Illugi og Bjarni eru pólitískir samherjar til margra ára. Markmið verkefnastjórnarinnar er að finna þann ramma peninga- og gjaldmiðilsstefnu sem til lengri tíma litið er heppilegastur til að styðja við efnahagslegan og fjármálalegan stöðugleika svo vitnað sé í tilkynningu frá fjármálaeftirlitinu.
Össur Skarphéðinsson gerir sér mat úr nefndinni á samskiptamiðlum og er yfirskriftin Fordyri helvítis. Þar fjallar hann um nefndarmennina en ásamt Illuga eiga þar sæti Ásgeir Jónsson og Ásdís Kristjánsdóttir. Össur gefur þeim þessa umsögn:
„Ásgeir Jónsson er með krónískan evrusvima þrátt fyrir gott uppeldi og Ásdís Kristjánsdóttir er þekkt fyrir hagfræðilega skynsemd. Þessu stórhættulega fólki er sem sagt trúað fyrir því að móta nýja peningastefnu. – Þarf þá ekki að fara að endurvekja Heimssýn og bjarga Íslandi aftur?“ spyr Össur sem finnst þó vanta lykilmann í nefndina. „Hvar er Vigdís Hauksdóttir þegar þjóðin þarf á henni að halda?“