„Þetta er skemmtilegt og hefur fengið afar mikil viðbrögð,“ segir blaðamaðurinn Svavar Hávarðsson í samtali við DV. Svavar sagði á Facebook frá aðdraganda þess að fjölskyldan – að áeggjan hins tíu ára, Atla – ákvað að fara út að tína rusl. Á sunnudag fyllti fjölskyldan þrjá sorppoka af rusli innan borgarmarkanna.

Þetta hófst á því að þeir feðgar, Svavar og Atli sonur hans, horfðu á sjónvarpsþætti með Ævari vísindamanni. „Við tókum netta fjögurra þátta syrpu í gærkvöldi og lærðum báðir margt gagnlegt. Eitt af því sem Ævar fjallaði um var að allir skipta máli þegar kemur að því að varðveita jörðina okkar sæmilega heillega – ef allir gera eitthvað verður þetta allt í lagi. Við getum nefnilega snúið vörn í sókn,“ skrifar hann á Facebook.

Áhrifavaldur Ævar vísindamaður er afar ánægður með framtak Atla.

Mynd: Þormar Vignir Gunnarsson

Boðskapurinn hreyfði við þeim. „Þess vegna fórum við fjölskyldan í dag og hófum verkefni sem Atli kýs að kalla hinu mjög svo lágstemmda nafni – #SavetheWorld,“ segir Svavar glettinn á Facebook. Fjölskyldan gekk rúmlega hálfan annan kílómetra, frá Skarfabakka að listasafni Sigurjóns Ólafssonar. Á þeirri göngu fylltu þau tvo svarta poka af rusli, eins og sjá má á meðfylgjandi mynd. Þriðji pokinn var svo fylltur við Vífilsstaðavatn og í Elliðaárdalnum.

Atli bað föður sinn að segja frá þessu á Facebook, og biðja þar fólk um að hjálpa honum að bjarga jörðinni. Svavar, sem má vera stoltur af syni sínum, segir við DV að þetta hafi aðeins verið fyrsta skrefið. Atli hugsi verkefnið til langrar framtíðar og hvetji alla til að taka þátt.

Ævar vísindamaður, Ævar Þór Benediktsson, er afar ánægður með framtak fjölskyldunnar. „Þetta er auðvitað ekkert annað en frábært og greinilegt að Atli er bæði með höfuðið og hjartað á réttum stöðum,“ segir hann við DV.