Colman leikur Elísabetu drottningu

Leikur Elísabetu drottningu í The Crown.
Olivia Colman Leikur Elísabetu drottningu í The Crown.
Mynd: 2017 Kirstin Sinclair

Breska leikkonan Olivia Colman mun leika Elísabetu Englandsdrottningu í þriðju og fjórðu þáttaröðinni af The Crown. Colman er gríðarlega virt leikkona og margverðlaunuð. Íslenskir sjónvarpsáhorfendur þekkja hana sennilega best í hlutverki Angelu Burr í hinum rómuðu þáttum Næturverðinum en hún hlaut Golden Globe fyrir leik sinn í þeim og sem Ellie Miller í sakamálaþáttunum Broadchurch.

Leikkonan Claire Foy fór með hlutverk drottningarinnar í fyrstu tveimur þáttaröðunum af The Crown og hlaut Golden Globe-verðlaunin. Upptökum á annarri þáttaröðinni lauk í vor og sýningar hefjast í desember á Netflix og þar kemur í ljós að ekki er allt með besta móti í hjónabandi Elísabetar og Filippusar.

Upptökur á þriðju þáttaröðinni hefjast á næsta ári og þar er fjallað um tvo áratugi í lífi drottningar, árin frá fertugu til sextugs. Verði áframhald á gerð þáttanna mun síðan þurfa að finna enn eina leikkonu til að fara með hlutverk drottningar frá sextugu fram á daginn í dag í fimmtu og sjöttu þáttaröð. Þar ætti Helen Mirren að geta komið sterklega til greina. Reiknað hefur verið út að síðasta þáttaröð yrði sýnd árið 2025 en þá væri drottningin orðin 99 ára og Filippus prins 104 ára.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.