Komnar með tvö þúsund læk

Jónína Helga Sigurðardóttir og Birna Friðbjört S. Hannesardóttir. Ljósmynd/Facebook.
Jónína Helga Sigurðardóttir og Birna Friðbjört S. Hannesardóttir. Ljósmynd/Facebook.

„Við vildum sýna nemendum hversu fljótt mynd sem sett er á netið fer um allan heiminn,“ segir Birna Friðbjört S. Hannesdóttir grunnskólakennari á Patreksfirði. Hátt í tvö þúsund manns hafa deilt færslu sem hún birti ásamt samkennara sínum Jónínu Helgu Sigurðardóttir á facebook en færslan er hluti af verkefni sem þær stöllur eru að vinna með nemendum sínum um netöryggi og neteinelti.

Þetta verkefni kom til í gegnum eTwinning lærdómssamfélagið þar sem mér var boðið að taka þátt. Verkefnið er hluti af Erasmus KA219 verkefni og heitir á ensku: "Stand Up and Say NO! to Cyber Harressment,“ segir Birna Friðbjört í samtali við DV.is en hún kennir nemendum á miðstigi í Patreksskóla á Patreksfirði.

Líkt og fram kemur á heimasíðu verkefnisins er markmið verkefnisins meðal annars að
minnka bæði líkamleg og andleg vandamál varðandi neteinelti í skólum og ala upp andlega hrausta einstaklinga auk þess að hjálpa nemendum að verða meðvitaðir stafrænir borgarar sem nota internetið og samfélagsmiðla á skynsaman hátt. Þá er einnig stefnt að því að auka vitund fólks í samfélaginu um siðferðilega rétta notkun á tækni og auka jákvæða stafræna borgaravitund.

Þann 15.nóvember síðastliðinn birti Birna meðfylgjandi ljósmynd á facebooksíðu sinni og hvatti um leið fólk til að deila færslunni áfram. Viðbrögðin létu svo sannarlega ekki á sér standa en er þetta er ritað, rúmum fimm sólarhingum síðar hafa 1.983 einstaklingar deilt færslunni.

„Merkilegar staðreyndir voru að á fyrstu 30 sekúndunum voru tveir búnir að deila. Eftir 5 mínútur voru níu búnir að deila og á sjöttu mínútu var myndin komin í dreifingu út fyrir landið. Á níundu mínútu var ókunnur aðili búinn að deila myndinni, einhver sem ég þekkti ekkert til! Ég bjóst ekki alveg við að þetta færi svona fljótt til ókunnugra, semsagt þeirra sem eru ekki á vinalista. Þetta gerðist ótrúlega fljótt.“

Líkt og sjá má á athugasemdum undir færslunni hafa einstaklingar hvaðanæva úr heiminum deilt færslunni og má þar nefna Frakkland, Noreg, Svíþjóð, England, Finnland, Írland, Þýskaland, Ástralíu, Spán, Ítalíu, Chile, Nýja Sjáland, Sviss, Holland, Tæland og svo mætti lengi telja. Hægt að fræðast nánar um verkefnið hér.

„Við erum ekki byrjuð að setja það niður á blað en það eru næstu skref. Allar niðurstöður verða síðan settar á heimasíðuna okkar.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.