Elton John: Eiturlyfin gerðu mig að skrímsli

Segist vera að bæta sér upp glataðan tíma.
Elton John Segist vera að bæta sér upp glataðan tíma.

„Ég er góð manneskju en eiturlyfin gerðu mig að skrímsli,“ sagði Elton John í tilfinningaþrunginni þakkarræðu þegar hann tók við mannúðarverðlaunum Harvard-stofnunarinnar í Cambridge á dögunum. Verðlaunin fékk tónlistarmaðurinn fyrir framlag sitt í baráttunni gegn HIV-sjúkdómnum.

Í ræðunni sagði Elton John einnig: „Ekki kasta lífi ykkar á glæ. Ég kastaði lífi mínu á glæ en í dag er ég að bæta mér upp glataðan tíma.“ Hann sagðist hafa séð á eftir vinum deyja úr eyðni og iðrast þess að hafa ekki lagt baráttunni gegn eyðni lið svo miklu fyrr en hann gerði. Hann talaði einnig máli mannréttinda, sagði að efla þyrfti heilsugæslu fyrir þá sem minna mættu sín, huga að rétti innflytjenda og berjast gegn kynþáttafordómum og ofbeldi. „Ég heiti ykkur því að við getum breytt heiminum og þá byrjum við á því að viðurkenna að mannkynið er eitt,“ sagði hann.

Eiginmaður Elton John, David Furnish, mætti með honum á athöfnina en saman eiga þeir synina Zachary, sex ára, og Elijah, sem er fjögurra ára. Hinir ungu synir fá þrjú pund í vasapeninga á viku, eitt pund eiga þeir að setja í góðgerðarmál, eitt pund eiga þeir að setja í sparibaukinn og einu pundi mega þeir eyða. Zachary og Elijah þurfa að vinna fyrir þessum vasapeningum og hjálpa til í eldhúsinu og í garðinum. „Þeir eiga að læra hversu mikilvægt það er að vinna og afla sér eigin tekna,“ segir hinn stolti faðir Elton John.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.