Brynjar Níelsson, þingmaður Sjálfstæðisflokksins, segir alvarlegan klofning vera kominn upp í sinni fjölskyldu. Bróðir hans, Gústaf Níelsson, fari fram fyrir Þjóðfylkinguna í Reykjavík í alþingiskosningunum, sem hafi sett mikinn þrýsting á móður þeirra.
Hún sé því að fara yfir um eins og „móðirin í jólalaginu, þegar jólasveinninn var að hefna sín á Skrámi“. „Svo eru menn að tala um klofning í Framsókn,“ segir Brynjar á Facebook-síðu sinni. Hafa miklar og fjörugar umræður skapast á á síðu Brynjars sem segir einnig um Gústaf bróður sinn og þennan klofning innan fjölskyldunnar.
„Flestir eru á því að pabbi hafi fundið hann á ruslahaugum í sígaunahverfi á suður á Ítalíu […] Ekki ólíklegt að hann hafi flotið yfir miðjarðahafið og endað á Ítalíu. Svipurinn bendir til þess.“
Facebook-vinur Brynjars, Halldór Fannar Sigurgeirsson stingur upp á lausn og segir: „Það er spurning hvort annar ykkar geti endurskilgreint sig svo hún geti beitt kynjakvótahugsjóninni.“ Brynjar svarar þá: „Hann er nú miklu meiri keeelling en ég, Halldór og það er soldið trans í honum.“
Sumir taka léttu gríni þingmannssins alvarlega og vilja verja Gústaf sem lét svo loks sjá sig í þræðinum og tók af allan vafa um að bróðurlega stríðni væri að ræða. Þegar Brynjar varð var við bróður sinn kvaðst hann ekki hafa gert ráð fyrir að hann væri í netsambandi fyrir austan.
„Var að fá netið rétt áðan góði minn,“ sagði þá Gústaf og bætir við á öðrum stað: „Brynjar er bara spældur. Nú mun Mamma og Gulli bróðir kjósa mig, en Vallý systir situr uppi með Binna í RS.“
Hér fyrir neðan má svo lesa þessar fjörugu umræður í heild sinni.