Brad Pitt er sagður hafa misst stjórn á skapi sínu og hellt sér yfir börn sín í síðustu viku. Þetta varð til þess að Angelina Jolie ákvað að sækja um skilnað frá Pitt.

TMZ greinir frá þessu. Atvikið á að hafa átt sér stað í einkaþotu á miðvikudag í síðustu viku og mun Pitt hafa verið í annarlegu ástandi þegar hann missti stjórn á skapi sínu og lét fúkyrðaflaumi rigna yfir börn sín. Heimildarmaður TMZ segir að Pitt hafi einnig „látið hendur skipta“ í umrætt sinn. Þetta varð til þess að Angelina Jolie ákvað að nú væri nóg komið og sótti hún um skilnað frá honum daginn eftir.

Samkvæmt umfjöllun TMZ eru barnaverndaryfirvöld í Los Angeles komin í málið auk þess sem lögreglan í Los Angeles, LAPD, er með málið til skoðunar. Tekin hafa verið viðtöl við Pitt og Jolie vegna málsins og þá stendur til að ræða við börn þeirra hjóna.

Heimildarmaður TMZ segir að Pitt taki þessar ásakanir alvarlega en hann neiti því staðfastlega að hafa beitt börn sín illri meðferð.

Pitt er sagður hafa grátbeðið Jolie um annað tækifæri og boðist til að fara í meðferð vegna áfengis- og fíkniefnaneyslu sinnar. „Hann bauðst til að bæta sig og fara í meðferð. Sannleikurinn er sá að hann elskar hana og dáir. Já, hann drakk og reykti gras. Og já, það hafa komið augnablik þar sem hann hefur reiðst og hækkað róminn. Hann veit að hann þarf að bæta sig og er að reyna það fyrir börnin,“ segir heimildarmaður The Sun.

Þessi sami heimildarmaður segir að Pitt sé góður faðir sem myndi aldrei ógna börnum sínum eða fjölskyldu. Jolie hafi hins vegar tekið þá ákvörðun að eyðileggja mannorð hans og fara alla leið með málið.