Palli biðlar til almennings að styrkja Kristján
„Hversu mikið er hægt að leggja á sumt fólk?“ Á þessum orðum hefst innlegg á Facebook síðu tónlistarmannsins ,Páls Óskars Hjálmtýssonar, sem vill vekja athygli á þeim skelfilegu atburðum sem vinur hans Kristján Snædal hefur þurft að ganga í gegnum upp á síðkastið.
Kristján missti húsið sitt og allt innbú í stórbruna á Seltjarnarnesi fyrir um 2 vikum. Nokkrum vikum áður missti hann konuna sína úr krabbameini eftir 5 ára baráttu.
„Hann missti í raun allt sitt og eftir þessa löngu baráttu við krabbameinið hjá konunni hans er hann í verulegum mínus og á nánast ekkert.“
Páll Óskar segir í færslunni að engar brunabætur fáist fyrir húsið þar sem hjónin misstu það á nauðungaruppboði í apríl. Þau fengu að leigja húsið í eitt ár af nýjum eiganda.
Fjárhagsvandamálin komu til vegna veikinda konunnar, þar sem það kostar ekkert lítið að vera veikur á Íslandi. Kristján var einnig mikið frá vinnu vegna veikindanna. Kristján Snædal þarf alla þá hjálp sem hægt er að veita honum, í gegnum þessa gríðarlega erfiðu tíma.
Einnig ætla vinir hans og félagar að efna til styrktartónleika í Félagsheimilinu Seltjarnarnesi mið 31.ágúst þar sem fram koma m.a. Alda Dís, Erna Hrönn, Ívar Daníels, María Ólafs, Magnús Hafdal og fleiri. Tónleikarnir hefjast kl. 20.
„Sýnum nú samhug í verki. Ég ætla allavega að leggja góða upphæð inn á reikningsnúmerið, þar sem ég kemst ekki á tónleikana sjálfur.“