Veronica Lake Veronica Lake var stórstjarna í Hollywood á tímum seinni heimsstyrjaldar og konur um allan heim stældu hárgreiðslu hennar. Leikkonan giftist fjórum sinnum og skildi jafnoft. Drykkjusýki átti þátt í fallandi gengi hennar í Hollywood. Hún greindist með skorpulilfur og lést fimmtug úr lifrarbólgu.

Errol Flynn Errol Flynn þótti einn kynþokkafyllsti karlmaður heims á fjórða og fimmta áratugnum. Hann var kvennamaður og drykkjumaður og lifði hratt. Hann fékk skorpulifur og lést úr lungnasjúkdómi þegar hann var fimmtugur. Líkami hans var þá, að sögn þess sem krufði hann, svo illa farinn að hann minnti á líkama gamals manns.

Jack Wild Saga Jack Wild er dapurleg. Hann sló í gegn sem Hrappur (The Artful Dodger) í söngvamyndinni Oliver þar sem hann var fullur af fjöri og sjarma. Tólf ára gamall byrjaði hann að reykja og sautján ára gamall var hann farinn að drekka ótæpilega. Tuttugu og eins árs gamall var hann orðinn alkóhólisti og þjáðist af sykursýki. Drykkjan eyðilagði leikferil hans og hjónaband. „Lífsstíll minn gerði mig að tifandi tímasprengju,“ sagði hann. Hann hætti að drekka árið 1989. Hann hvatti unga leikara til að gera ekki sömu mistök og hann hafði sjálfur gert og sá svo eftir. Þegar Daniel Radcliffe hreppti hlutverk Harry Potter skrifaði Wild honum opið bréf þar sem hann varaði við hættunum sem fylgja því að vera barnastjarna. Árið 2000 greindist Wild með krabbamein í munni og sagði sjálfur að það væru afleiðingarnar af reykingum sínum og drykkju. Fjarlægja varð tungu hans og raddbönd. Hann lést árið 2006, 53 ára.

William Holden William Holden hlaut Óskarsverðlaun árið 1953 fyrir leik sinn í myndinni Stalag 17 og átti langan og farsælan kvikmyndaferil. Hann var í þrjá áratugi kvæntur leikkonunni Brendu Marshall en átti í ástarævintýrum með öðrum konum þar á meðal Audrey Hepburn. Síðustu árin var hann í sambandi með leikkonunni Stephanie Powers. Holden var mikill drykkjumaður. Kvöld eitt árið 1981 var hann einn heima og drukkinn þegar hann datt og rak höfuðið í borð. Honum blæddi út. Lík hans fannst fjórum dögum síðar.

Oliver Reed Oliver Reed var alræmdur fyrir drykkju sína með tilheyrandi fyrirgangi. Hann var í fríi frá kvikmyndaleik í The Gladiator og var á krá þegar hann var manaður í að fara í drykkjukeppni. Hann hafði að sögn samstarfsfélaga ekki drukkið mánuðum saman en skellti sér í keppnina með þeim afleiðingum að hann fékk hjartaáfall og lést. Hann var 61 árs. Leikstjóri Gladiator, Ridley Scott, tileinkaði myndina minningu Reed.