María Marteinsdóttir og André Heinz gengu í hjónaband í Svíþjóð um helgina
Hin íslenska María Marteinsdóttir gekk um helgina í hjónaband með André Heinz erfingja Heinz-veldisins. Andre þessi er stjúpsonur Johns Kerry, utanríkisráðherra Bandaríkjanna, og var hann að sjálfsögðu mættur í brúðkaupið sem fram fór í Stokkhólmi í Svíþjóð á laugardag.
André er 46 ára en María er 35 ára en samkvæmt frétt Vísis í fyrra kynntust þau André og María í Svíþjóð fyrir tæpum fjórum árum.
Á vef Aftonbladed má sjá myndir úr brúðkaupinu og er óhætt að segja að margt hafi verið um manninn. Athöfnin fór fram í Sörmland sem er fallegur staður suður af Stokkhólmi. Hollywood-leikkonan Jodie Foster sést á einni af myndunum auk Johns Kerry. Þá er Julia Roberts einnig sögð hafa verið á meðal gesta.
Í frétt Aftonbladet kemur fram að öryggisgæsla hafi verið mikil á meðan á brúðkaupinu stóð. Þannig hafi John Kerry verið umkringdur lífvörðum og þá sinntu sænsk löggæsluyfirvöld einnig öryggisgæslu.
María er eðlisfræðingur að mennt og starfar hún á Karólínska-háskólasjúkrahúsinu í Stokkhólmi. André er sonur Terese Heinz Kerry en hún og John Kerry hafa verið gift frá árinu 1995.