Dubai er löngu orðið heimsþekkt fyrir gríðarlegar öfgar er kemur að mannvirkjum, lúxusbifreiðum og lífstíl ríka fólksins. Í furstadæminu má meðal annars finna hæsta skýjakljúfur heims, tilbúna eyju og lúxus hótel sem eru útbúin munaði sem fyrirfinnst hvergi annarstaðar í veröldinni.
Nýtt hótel sem er í byggingu í Dubai hefur vakið gríðarlega athygli fyrir framúrskarandi stíl en það mun án efa setja upplifun af hótelgistingu á æðra stig.
Á hótelinu verður 7000 fermetra regnskógur, tilbúin strönd, sundlaugar með rennibrautum og annarri afþreyingu fyrir litla fólkið og tré sem svala gestum í hitanum með því að úða vatni yfir þá.
Framkvæmdin mun kosta um 230 milljón pund eða sem nemur 35 milljörðum íslenskra króna. Hótelið verður rekið undir stjórn Hilton veldisins en Dubai er ekki aðeins vinsæll ferðamannastaður fyrir moldríkt fólk heldur er staðsetning furstadæmisins mikilvæg tenging flugumferðar á milli Evrópu og Asíu.
Hótelið opnar árið 2018 en um helgina birtu forsvarsmenn þess myndir af því sem koma skal. Hótelið verður á 47 hæðum en þar verður einnig að finna framandi plöntutegundir sem eiga að skapa einstaka upplifun fyrir gesti.
Á hótelinu, sem er ætlað að sem er ætlað að verða fjölskylduhótel, verður einnig að finna leikvöll fyrir börn með ævintýraþema, keilusal og trampólín garð.