„Heimurinn hrundi algjörlega þegar við fengum þessar fréttir“
11 ára drengur bjargaði lífi systur sinnar með því að koma auga á æxli í hálsi stúlkunnar þegar þau voru í svokölluðum skrímslaleik sem gengur út á að kitla hvort annað.
Atvikið átti sér stað í lok júní. Í einu hláturskastinu sá drengurinn beint ofan í hálsinn á systur sinni og tók eftir einhverju undarlegu. Hann lét móður þeirra strax vita sem fór beint með stúlkuna á bráðamóttöku.
Á þeim tímapunkti fór atburðarrás í gang sem sér enn ekki fyrir endann á. Eftir að þau komu á sjúkrahúsið fengu þau viðtal hjá sérfræðingi sem tók sýni og greindi í framhaldinu stúlkuna, sem heitir Amy, með illkynja æxli í mjúkvef, öðru nafni rhabdomysosarcoma, sem er mjög sjaldgæf tegund af krabbameini.
Þar sem meinið er svo sjaldgæft þarf Amy að ferðast til Bandaríkjanna þar sem hún fer í sérhæfða geislameðferð. Hún hefur nú þegar farið í einn uppskurð þar sem hluti æxlisins var fjarlægður.
„Það fyrsta sem ég hugsaði þegar ég sá þykkildið í hálsi Amyar var að þetta væri æxli. Frændi minn lést nýlega úr krabbameini og pabbi minn hefur líka fengið krabbamein svo ég hugsa mikið út í þennan illvíga sjúkdóm.“ Þetta segir Carly móðir barnanna og bætir við.
„Sem móðir ákvað ég að taka enga sénsa og fór beint með hana á spítalann. Ég var með stóran hnút í maganum en tókst samt að halda andliti fyrir krakkana. Ég fann bara á mér að það væri eitthvað mikið að.“
Núna er Amy, sem er 6 ára, í stífri lyfjameðferð en hún þarf að vera búin með níu lyfjakúra áður en hún fer til Bandaríkjanna í lok ágúst. Móðir hennar hefur miklar áhyggjur af veikindum dóttur sinnar en er þó handviss að hún eigi eftir að fá fullan bata.
„Heimurinn hrundi algjörlega þegar við fengum þessar fréttir. Hún er búin að standa sig svo vel og sýnir ótrúlegan styrk í öllu þessu ferli.“
Carly segir sömuleiðis að Aaron hafi án efa bjargað lífi systur sinnar þar sem æxlið hefði haldið áfram að vaxa óáreitt ef hann hefði ekki komið auga á það.
Aaron segir í samtali við Daily Mail að hann hafði í fyrstu verið með samviskubit yfir því að hafa sagt frá þykkildinu í hálsinum á systur sinni þar sem allir hefðu verið í svo miklu uppnámi. Hann segist þó skilja það núna hversu mikilvægt það var að segja frá.
Hér má sjá sögu fjölskyldunnar sem er að safna fjármagni fyrir meðferð Amy á GoFundMe