Katrín Tanja Davíðsdóttir, sem bar sigur úr bítum á Crossfit-leikunum í Los Angeles um helgina, tileinkaði ömmu sinni sigurinn. Katrín birti meðfylgjandi mynd á Instagram-síðu sinni en þar sést amma hennar hvetja hana til dáða.
Nútíminn greinir frá því að amma Katrínar, Hervör Jónasdóttir, hafi fallið frá fyrr á árinu en þær Katrín og Hervör voru nánar. Þannig bjó hún hjá ömmu sinni og afa frá því að hún hóf nám í framhaldsskóla en fyrr á þessu ári flutti hún til Boston.
Myndin á Instagram hefur vakið mikla athygli og hafa rúmlega 22 þúsund notendur líkað við myndina. Í viðtali í Íslandi í dag í fyrra sagði Katrín að amma hennar og afi stæðu þétt við bakið á henni.
„Þau styðja mig rosalega vel í þessu. Amma mín er þekkt fyrir að vera háværust á pöllunum. Það heyrist hæst í henni. Þegar ég vann fyrsta Íslandsmeistaratitilinn þá var viðtal við hana í kvöldfréttunum, ekki mig,“ sagði Katrín.