„Þetta er eitthvað það fallegasta sem ég upplifað í langan tíma,“ segir Sif Sigurðardóttir, móðir hins 11 ára gamla Sigurðar Tuma en hann fékk heldur betur óvæntan glaðning á föstudaginn. Sigurður, eða Siggi Tumi, er greindur með einhverfu og á að sögn Sifjar erfitt með margmenni líkt og afmælisveislur. Ákvað Viktoría bekkjarsystir hans því að taka til sinna ráða og koma með afmælisveisluna sína til hans.

„Siggi Tumi var greindur með dæmigerða einhverfu þegar hann var rúmlega þriggja ára gamall og því fylgja ýmisskonar þroskaskerðingar og svo félagslegir þættir eins og er algengt hjá einhverfum,“ segir Sif í samtali við blaðamann en Siggi Tumi stundar nám í Oddeyrarskóla á Akureyri. Að sögn Sifjar hafa sömu skólafélagarnir fylgt honum frá upphafi, og taka þau Sigga Tuma eins og hann er.

Mæðgin á góðri stundu Sif og Siggi Tumi í Orlando

„Þau þekkja hann mjög vel og allar hans sérþarfir. Hann verður aldrei fyrir neinni stríðni og fær alltaf að vera með í öllu, á sínum forsendum. Honum er boðið í afmæli eins og hinum og það eru aldrei nein vandamál, sem er auðvitað bara frábært,“ segir Sif jafnframt en bætir við að vegna einhverfunnar eigi Siggi Tumi erfitt með að vera í margmenni og forðist því ævinlega að mæta í veislur.

Siggi Tumi á góða vinkonu í skólanum, Viktoríu Mist Birgisdóttur og hélt hún upp á afmælið sitt síðastliðinn föstudag. Þangað hafði hún boðið Sigga Tuma sérstaklega miðvikudaginn áður. „Hann var á báðum áttum með að fara en ákvað svo að lokum að fara ekki,“ segir Sif sem sendi þá sms á móður Viktoríu, Unni Elvu Vébjörnsdóttur, um að Siggi Tumi kæmi ekki í afmælið. „Mér skilst að hún Viktoría hafi orðið alveg afskaplega leið þegar hún frétti að Siggi Tumi myndi ekki koma og því ákváðu þær mæðgurnar að koma bara með afmælið til hans þegar veislan var búin.“

Siggi Tumi vissi varla hvaðan á sig stóð veðrið þegar þær mæðgur komu til hans í heimsókn eftir veisluna og höfðu meðferðis dýrindis kræsingar, afmælisköku og íspinna. Segir Sif að skiljanlega hafi hennar maður orðið bæði hissa og kjaftstopp.

Sáttur og glaður Siggi Tumi var heldur betur lukkulegur með hina óvæntu gjöf.

„Hann sýnir oftast ekki mikil tilfinningaleg viðbrögð en það var alveg greinilegt að hann var ofboðslega ánægður og glaður með þessa óvæntu sendingu. Þetta var algjörlega dásamlegt að sjá,“ segir hún og kveðst afar snortin yfir þessum óvænta glaðning frá Viktoríu og móður hennar. „Þetta er bara svo einstakt. Þetta er alveg yndislegur hugsunarháttur.“