„Hann er lítillega frábrugðinn efnislega,“ segir Skarphéðinn Guðmundsson, en þau mistök áttu sér stað í gær að röng útgáfa var send út af sakamálaþættinum Ófærð sem var sýndur á RÚV í gærkvöldi. Um var að ræða sjöunda þáttinn í þessari seríu sem hefur fengið fádæma áhorf sé miðað við áhorfstölur Gallup.

Skarphéðinn segist ekki kunna að útskýra nákvæmlega hver munurinn var, „þetta var dálítið tæknilegs eðlis, útgáfan sem um ræðir var öðruvísi klippt og svona einhver blæbrigðamunur á þessu,“ útskýrir hann.

Í yfirlýsingu á vefsíðu RÚV segir Gunnar Örn Guðmundsson, yfirmaður tæknisviðs hjá RÚV:

„Það var yfirsjón í tækni- og efnisskoðun sem olli tæknivandræðum í útsendingu í gærkvöldi. Það olli því að röng útgáfa af þættinum rataði í loftið og við hörmum það mjög, sérstaklega þar sem við höfum mikinn metnað fyrir hönd þessarar frábæru þáttaraðar. Rétta útgáfa er og verður hins vegar í boði nú og næstu tvær vikurnar í gegnum endursýningu og Sarpinn okkar.”

Þá voru einnig gerð mistök þegar heimildarmynd Ingólfs Bjarna Sigfússonar, Á flótta, var sýnd í gærkvöldi.
Við þetta má bæta að rétt útgáfa verður sýnd á RÚV í kvöld, klukkan 23:15 og á fimmtudagskvöld klukkan 23:05. Þá verður hún aðgengileg á Sarpinu og í gegnum VOD-þjónustu Vodafone og Símans.

Þetta er í annað skiptið sem tæknileg mistök uppgötvast í kringum Ófærð, en áður voru gerðar athugasemdir við hljóð þáttanna, og var það lagað að sögn RÚV.