„Ómar Ragnarsson fékk dag náttúrunnar sem var verðskuldað, Jónas Hallgrímsson dag íslenskrar tungu. Það þarf að vera dagur almenns hressleika og léttleika, hvað þá í skammdeginu. Ég gat ekki ímyndað mér að neinn betri ætti þennan dag,“ sagði Jóhann Örn Ólafsson, útvarpsmaður á Bylgjunni, í Bítinu í morgun.
Jóhann setti athyglisverða færslu inn á Facebook í gær þar sem hann lagði það til að fæðingardagur Hemma, 9. desember, yrði dagur hressleika og stressleysis. Þessi hugmynd fékk góðan hljómgrunn en Hermann, sem varð bráðkvaddur sumarið 2013, hefði orðið sjötugur í dag. Hermann var þekktur fyrir léttleika og einstaka skapgerð sem fleytti honum langt og gerði hann að einum ástsælasta skemmtikrafti þjóðarinnar.
Í færslunni sagði Jóhann: „Á morgun, 9. desember verður í fyrsta sinn haldinn, „Verum hress og ekkert stress„ dagurinn. Hann gengur út á hressleika og stressleysi, mikinn hlátur og almennan fíflagang. Hverjum og einum er í lófa lagt hvernig dagurinn er látinn líða en aðalatriðið að hafa þessa þekktu kveðju efst í huga.
Ætlunin er að halda „Verum hress og ekkert stress„ daginn hátíðlegan 9. desember ár hvert. Hemmi Gunn fæddist 9. desember 1946 og hefði því orðið 70 ára á morgun. Allir með!“
Þegar þetta er skrifað hafa tæplega fjögur hundruð manns „lækað“ færsluna og þá hefur fjöldi fólks deilt henni. Jóhann ræddi hugmyndina í Bítinu á Bylgjunni í morgun en þangað var einnig mættur HAlldór Einarsson, betur þekktur sem Henson. Halldóri lýst vel á hugmynd Jóhanns.
„Brilljant. Það hefur verið búinn til dagur einhvers málefni af minna tilefni,“ sagði Halldór.