„Ég er alltaf til í að gjamma um það og finnst asnalegt að slíkt sé eitthvað til að skammast sín fyrir. Það er algjört næntís dæmi. Ég vil ekki sjá það,“ segir Atli Sigþórsson, einnig þekktur sem rapparinn og skáldið Kött Grá Pje en í viðtali sem birtist í nýjustu útgáfu Akureyri Vikublaðs tjáir hann sig opinskátt um andlega kvilla sem hafa háð honum í gegnum árin.
Atli rifjar upp unglinsárin á Akureyri, þar sem hann var að eigin sögn „ferlega steríótýpískur listamaður“
„Ég var lítið fyrir félagslíf og jákvæða og góða stemningu; fannst allt slíkt glatað. Í endurliti var MA notalegur staður. Það var ég sjálfur sem var ómögulegur. Ég hef barist við þunglyndi og þegar maður er unglingur er svo stutt í sveiflur; allt mögulegt getur verið heimsendir og himnaríki.
Ég lenti til dæmis í ástarsorg og lét alveg eins og hálfviti í kringum það allt saman, sem er hrikalega vandræðalegt. Ég er enn að vinna mig út úr því og vona að fólk hafi fyrirgefið mér.“
Atli kýs að tjá sig opinskátt um andleg veikindi sín, og segir jafnframt enga ástæðu vera til þess að fara með þau í felur.
„En ég fer alltaf niður af og til. Þessi tími finnst mér ágætur en strax fyrsta janúar á eitthvað til að breytast. Hins vegar hef ég verið á góðri siglingu síðustu misserin og hef ekki farið langt niður síðan einhvern tímann árið 2015. Ég krossa fingur, vona það besta og gleypi töflur eins og smartís.“
Atla hefur þó tekist ágætlega að lifa með kvíðanum.
„Eins hef ég átt til að fá kvíðaköst en er á ágætis lyfjum sem stýra því. Ég er því í fínum farvegi. Kvíði er hræðilegur, ógeðslegur, lamandi óþverri en blessunarlega er hægt að vinna bug á honum með lyfjagjöf.“