„Mig hefur oft langað að segja þessa sögu enda heyrir maður ítrekað svipaðar frásagnir þar sem óskir móður eru hreinlega hunsaðar. Það munaði bara hársbreidd að illa færi,“ segir söngkonan ástsæla Sigríður Beinteinsdóttir, sem landsmenn þekkja sem Siggu Beinteins. Í opinskáu viðtali sem birtist í nýjasta tölublaði MAN talar hún um upplifun hennar og sambýliskonu hennar, Birnu Maríu, af samskiptum við starfsfólk fæðingardeildar LSH þegar tvíburar þeirra komu í heiminn fyrir fimm árum síðan, en sú upplifun er ekki jákvæð.
Sigga var 49 ára gömul þegar börnin komu í heiminn. „Ég er handviss um að ég hefði átt auðveldara með þetta 29 ára en 49 ára,“ segir Sigga en börnin sváfu lítið fyrstu fjögur æviárin,“ segir Sigga og bætir við að réttilega ætti hún að vera amma barnanna „miðað við normið.“
Birna var hætt komin af meðgöngueitrun og á sínum tíma gekk illa að koma börnunum í heiminn. á tímabili var ástandið tvísýnt að sögn Siggu.
„Birna vissi allan tímann að það var eitthvað ekki eins og það átti að vera og sór og sárt við lagði að sama hvað hún rembdist þá væri allt fast. Það var ekki hlustað á okkur. Birna mín og börnin mín tvö voru hætt komin á þessum tímapunkti. Birna aðframkomin og ráðaleysi ríkti á fæðingardeildinni,“ segir Sigga og lýsir því næst viðmóti starfsfólks spítalans.
„Þegar þarna var komið við sögu spurði ég hvort það væri ekki tímabært að taka börnin með keisara. Svarinu sem við fengum þá mun ég aldrei gleyma: „Það kostar milljón að opna skurðstofuna og það verður ekki gert.“
Viðtalið við Siggu má finna í heild sinni í MAN sem kemur í verslanir í dag.