Til orðaskaks kom á milli söngvaranna Svölu Björgvinsdóttur og Helga Björnssonar í þættinum Voice sem sýndur er á Skjá einum. Svala og Helgi eru dómarar í þættinum en í þættinum berjast dómararnir um að fá keppendur í sitt lið. Taka þeir meðal annars að sér að þjálfa keppendur. Svala og Helgi vildu bæði fá efnilega söngkonu í sitt lið. Í myndskeiði á vef mbl.is má sjá samskipti Helga og Svölu.
„Þú lætur eins og lítill krakki,“ sagði Helgi þá.
Svala: „Það er vegna þess að mig langar að vinna með henni.“
Helgi: „Já já, mig langar líka að vinna með henni.“
Svala: „Ekki eins mikið og mér.“
Helgi: „Ég ætla að segja þér af hverju, það er additjút í þér þegar þú ert að syngja og sýndir það strax áðan. Svala getur náttúrulega kennt þér hvernig á að fara í eitthvað sokkabuxur og svona.“
Svala deildi frétt mbl.is og sagði að hún gæti ekki sætt sig við karlrembu eins og þá sem Helgi sýndi af sér. „Ég sætti mig ekki við karlrembu komment!!!! Ég er hæfileikarík og sterk kona og ég veit hvað ég vil. […] Maður á aldrei á láta neinn gera lítið úr hæfileikum sínum.“
Bætti Svala við að hún tæki karlrembukomment Helga ekki nærri sér.
„ … sem fyrirmynd fyrir ungar stelpur og konur þá verð ég að mótmæla svona kommentum!!! sem kona í mínum bransa þá hef ég þurft að berjast fyrir ÖLLU því sem ég hef áorkað og tala af mikilli reynslu þar og hef oft heyrt svipuð komment sögð við konur í mínum bransa í gríni og ekki í gríni….og mér finnst það bara alls ekki í lagi og heldur ekkert fyndið! ég og Helgi erum mjög góðir vinir og verðum það alltaf.“