Pamela Anderson kom til tals í Brennslunni í morgun
„Ég tek Pamelu fram fyrir Kristján Loftsson hvenær sem er.“ Þetta sagði blaðamaðurinn Benedikt Bóas Hinriksson í spjalli við þá Hjörvar Hafliðason og Kjartan Atla Kjartansson í Brennslunni á FM957 í morgun.
Benedikt tókst fyrr í vikunni að landa viðtali við fyrrum Baywatch stjörnuna Pamelu. Viðtalsefnið var þó ekki á persónulegum nótum heldur fjallaði um hvalveiðar, en Pamela er mikill dýraverndunarsinni. Í viðtalinu segir hún meðal annars að Ísland sé hræðileg þjóð sem stærir sig af að drepa hvali.
Þá segir Pamela að einn maður græðir á hvalveiðum á Íslandi og kalli þannig skömm yfir alla þjóðina. Þar á hún við Kristján Loftsson, framkvæmdarstjóra Hvals hf.
Eftir stutt spjall í Brennslunni þar sem blaðamennirnir þrír tjáðu eilífa ást sína á Pamelu og hvernig hún mótaði æskuár þeirra sagði Hjörvar.
„Besti dagur ævi minnar var þegar myndbandið lak út og ég vissi að ég væri að fara að fá það í hendurnar. Það var yndislegur dagur.“
Þar á Hjörvar við myndband af Pamelu og fyrrverandi eiginmanni hennar Tommy Lee í ástarleik. Myndbandið, sem þau sögðu að hefði verið stolið af heimili þeirra, fór í umferð á veraldarvefnum árið 1998. Þrátt fyrir að vera komið nokkuð til ára sinna lifir það enn góðu lífi á netinu.
„Þetta eldist ekki neitt,“ sagði Benedikt um myndbandið.
Þá sagði Bóas að það hefði verið nokkuð verk að ná tali af Pamelu og hann þurfti að lofa því að spyrja ekkert út í Baywatch árin. „Ég fór í gegnum 5 aðstoðarmenn og þurfti að senda spurningarnar fyrirfram. Það leið yfir mig þegar hún hringdi.“
Áður en viðtalið við Pamelu fór í prent sendi Benedikt aðstoðarkonu hennar afrit. Hún skildi ekkert í því hvað stóð í viðtalinu en gaf engu að síður grænt ljós á þar sem henni líkaði það sem hún sá.