„Ég vil byrja á því að biðja stuðningsmennina, kostendur, vini og mótherja minn afsökunar á því að ég mun draga mig út úr bardaganum í Belfast,“ ritar Gunnar Nelson bardagakappi á fésbókarsíðu sína fyrr í dag. Fyrirhugað var að Gunnar myndi mæta Suður-Kóreumanninum Dong Hyun Kim í aðalbardaga UFFC í Belfast þann 19. nóvember. Nú er hins vegar ljóst að Gunnar þarf að hætta við vegna meiðsla, en hann kveðst hafa hlakkað mikið til bardagans.
Gunnar meiddist á ökkla á opinni æfingu fyrir UFC á dögunum og kveðst hann ekki hafa getað stigið í fótinn í nokkra daga. Tíu dögum síðar hafi hann þó geta gengið eðlilega og því lagt sig allan fram við æfingar. Fyrir viku síðan tjáðu þjálfarar hans honum hins vegar að hann þyrfti meiri tíma og gæti hvorki barist né æft. Gunnar kveðst þá sjálfur hafa gert sér grein fyrir að hann væri ekki í standi til að keppa.
„Enn og aftur vil ég biðja alla þá sem höfðu bókað miða og ferð á bardagann afsökunar, sem og alla aðdáendurna sem höfðu hlakkað til bardagans, líkt og ég. Ég sný aftur fljótlega og verð betri en nokkru sinni fyrr,“ ritar Gunnar jafnframt um leið og hann þakkar fyrir stuðninginn.