Söng á tveimur tónleikum og vann í sjö tíma í hljóðveri – Gleymdi að vista upptökurnar og því tapaðist öll vinnan
Tónlistarkonan Gréta Salóme Stefánsdóttir er með mörg járn í eldinum. Sumir dagar eru ansi þéttbókaðir og það átti svo sannarlega við um gærdaginn. Skólatónleikar með Sinfóníuhljómsveitinni, aðrir tónleikar í Kópavogi, fundarhöld og síðan hljóðsversupptaka á nýju auglýsingastefi þar sem skilafresturinn var að líða út. Í slíku annríki hjálpaði það ekki til að byrja daginn á að innbyrða fimm svefntöflur.
„Þetta var ekki mín stærsta stund. Ég get alveg staðfest að ég hef átt betri daga, segir Greta Salóme og skellihlær við fyrirspurn blaðamanns. Forsagan er sú að Gréta var búin að vera raddlaus í tvær vikur og fór því til læknis til þess að reyna að fá bót meina sinna. „Hann setti mig á rótsterkan sterakúr og ég átti að taka fimm töflur um morgunin. Ég var ekki alveg vöknuð þegar ég fór á fætur og tók því rangt pilluglas og henti upp í mig fimm svefntöflum,“ segir Greta kímin. Hún tekur þá fram að um melótónín var að ræða, sem eru náttúrulegar svefntöflur. „Þær virka samt mjög vel á litlar manneskjur eins og mig.“
Hún áttaði sig ekki mistökunum fyrr en að hún fann þreytuna svífa á sig. „Röddin lagaðist ekki neitt og ég átti erfitt með að halda augnlokunum opnum. Það var hinsvegar ekki um neitt annað að ræða en að halda áfram og sem betur fer voru tónleikarnir svo skemmtilegir að ég hélst vakandi. Ég þurfti þó að hafa mig alla við til að spila hratt og örugglega,“ segir söngkonan og er skemmt yfir minningunni. Hún vill þó taka það sérstaklega fram að blessunarlega var henni skutlað milli tónleikarstaða og því skapaðist engin hætta útaf ástandi hennar. Dagurinn var þó síður en svo búinn.
„Ég þurfti að skila inn stefi fyrir auglýsingu og þurfti því að fara beint í hljóðver að taka það upp. Sú vinna tók sjö klukkustundir og ég komst loks heim í háttinn þegar klukkan var hálf fjögur í nótt.“ Þegar Greta vaknaði síðan eftir stuttan nætursvefn þá dundi áfallið yfir. „Þá kom í ljós að ég hafði ekki vistað upptökurnar og því var sjö klukkustunda vinna farin í vaskinn. Það var pottþétt svefntöflunum að kenna, segir Greta og sér svo sannarlega húmorinn í þessum aðstæðum. „Ég þarf að vinna þetta aftur í dag en ég verð bara á Pepsi-Maxi,“ segir hún.
Greta Salóme gat þó huggað sig við það að nýtt myndband við ábreiðu hennar af laginu „Seven Nation Army“, sem hún frumsýndi á dögunum, hefur hlotið góðar viðtökur og er byrjað að „trenda í Víetnam“. „Þetta var mjög skemmtileg áskorun. Hún barst frá fylgjendum mínum á Snapchat og þeir völdu þetta lag. Ég mátti aðeins nota röddina og fiðluna. Ég lagði mig alla fram við að gera þetta lag að mínu og rappaði meira að segja og notaði fiðluna sem trommu. Ég er mjög sátt við útkomuna,“ segir Gréta Salóme.
[youtube https://www.youtube.com/watch?v=WYlQF7mdGHA&w=560&h=315]