Hálftímalangur þáttur um landsliðsmarkvörðinn Björgvin Pál Gústavsson
„Ég var vandræðaunglingur og erfitt barn. Hafði of mikla orku og var til vandræða í skóla“ segir handboltamaðurinn Björgvin Páll Gústavsson í hálftímalöngu myndbandi sem fyrirtækið Spider Tech hefur birt. Þar er Björgvini fylgt eftir en í sumar æfði hans ýmsar íþróttir. Í myndbandinu sést hann æfa aflraunir með Hafþóri Júlíusi Björnssyni, fótbolta með Gunnleifi Gunnleifssyni markverði auk þess að æfa MMA, körfubolta og jóga. Rætt er við fjölda þekktra íþróttamanna um Björgvin Pál.
Í upphafi myndbandsins ræðir hann um æsku sína. Hann stendur við fjölbýlishúsahverfi í Kópavogi, sem hann kallar gettóið sitt, og segist hafa átt erfitt sem barn og unglingur. „Þessi reynsla styrkti mig,“ segir hann í myndbandinu. „Fjölksyldan mín var fátæk. Ég held ég hafi búið í hverri einustu íbúð á þessu svæði. Við fluttum oft.“
Hann segist þó hafa fengið stórt hjarta út úr uppeldinu og að reynslan hafi styrkt sig. „Svo fann ég réttu íþróttina fyrir mig. Handbolti hjálpaði mér mikið og ég á líf mitt að þakka handboltanum. Í kjölfarið kynntist ég konunni minni og lífið varð að fallegu lagi.“
[youtube https://www.youtube.com/watch?v=mpRPVvc_V70&w=560&h=315]
