Lilja Katrín hættir sem ritstjóri Séð og heyrt

Lilja Katrín Gunnarsdóttir hefur sagt starfi sínu sem ritstjóri tímaritsins Séð og Heyrt lausu. Hún ætlar að venda sínu kvæði í kross og mun hefja störf hjá framleiðslufyrirtækinu Sagafilm í haust eftir að hafa unnið hjá útgáfufélaginu Birtingi í nær sex ár.

„Ég byrjaði fyrst í sumarvinnu, árið 2006 og vann síðan áfram með skóla. Kom síðan við á DV og var þar í um það bil ár eða svo, en er annars búinn að vinna hjá Birtingi í allan þennan tíma og hef starfað sem ritstjóri Séð og heyrt í rétt tæpt ár.“

Aðspurð hvort að hún hafi fengið nóg af blaðamennskunni segir Lilja Katrín svo ekki vera. „Nei, nei, mig langaði bara að prófa eitthvað annað, takast á við eitthvað nýtt. Ekki að festast í sama farinu endalaust.“

Um hvaða starfi hún muni gegna hjá Sagafilm segir hún að það sé frekar erfitt að útskýra. „Ég verð að vinna með framkvæmdarstjóranum í ýmsu. Allskonar verkefnum sem varða íslenskt sjónvarpsefni og bíómyndir og bara það sem þeir eru að framleiða. Þetta verður held ég mjög fjölbreytt, þetta hljómaði að minnsta kosti mjög vel.“