Þóra býður sig fram til forseta

Þóra Arnórsdóttir ætlar að bjóða sig fram til embættis forseta Íslands en það tilkynnti hún vinum og fjölskyldu í gær. Í fréttatilkynningu frá stuðningsmönnum hennar er boðað til fundar í Hafnarborg í Hafnarfirði klukkan korter yfir fjögur í dag.

Í henni segir að hún muni ávarpa fundinn klukkan hálf fimm og skýra frá ákvörðun sinni varðandi framboð til embættis forseta Íslands.

Þóra er í viðtali í Páskablaði DV og ræðir meðal annars um sýn sína á forsetaembættið. „Forsetinn er eini embættismaðurinn sem þjóðin öll fer og kýs persónukjöri. Það þýðir líka í mínum huga að hann eigi að vera forseti allrar þjóðarinnar. Auðvitað má segja að kosningar séu alltaf pólitískar á einhvern hátt, en forsetakjör hefur ekkert með flokkapólitík að gera. Forsetinn er ekki á vegum flokka, hann er ekki á vegum hagsmunahópa og hann tekur ekki afstöðu í pólitík, blandar sér í ekki í pólitískar deilur,“ segir Þór og heldur áfram:

„Fólk lætur ekki segja sér hvern það eigi að kjósa eftir einhverjum pólitískum línum. Um leið og forsetinn blandar sér í pólitík er hann farinn að skipa sér bak við víglínu og nóg er af þeim í þessu samfélagi. Ég sé fyrir mér manneskju sem ýtir undir sátt. Í grunninn erum við friðsæl þjóð þótt ýmislegt hafi gengið á og umræðan eins og hún hefur verið síðustu árin ekki beinlínis ýtt undir það góða í þjóðarsálinni. Það er miklu fleira sem sameinar okkur en sundrar og forsetinn á að hvetja fólk til góðra verka, hann á að stappa í það stálinu þegar þess þarf og út á við þarf hann að vera góður málsvari. “