Leikkonan Christina Hendricks er fyrir löngu búin að stimpla sig inn sem ein af gyðjum Hollywood með hlutverki sínu í þáttunum Mad Men.

Tímaritið BlackBook hefur nú staðfest að hún muni sitja fyrir í myndaþætti í mars-útgáfu tímaritsins en þar segir hún líka í viðtali að henni líði vel nakinni. Það þýðir þó ekki að nokkur annar maður en eiginmaður hennar fái að sjá hana á Evuklæðunum.

„Mér líður mjög vel nakinni. Ekki samt fyrir framan annað fólk, bara heima fyrir framan manninn minn. Þar líður mér vel án fata,“ segir Hendricks í viðtalinu sem birtist í mars.

Fimmta þáttaröðin af Mad Men hefst í sama mánuði.