TÍMAVÉLIN: Árin 1982 og 1984 fór íslenskur drengur, Helgi Óskarsson, í lengingaraðgerðir til Síberíu. Lengdist hann þá alls um 31 sentimetra, og var orðinn 148 sentimetrar að hæð að þeim loknum.

„Ég var yfir mig ánægð að sjá Helga. Þetta gengur allt svo vel“ sagði Ingveldur Höskuldsdóttir, móðir Helga í viðtali við DV 10. ágúst árið 1984.

Það var prófessor Ilizarov sem hafði umsjón með aðgerðum Helga í borginni Kurgan í Síberíu í þáverandi Sovétríkjunum. Í fyrra skiptið var hann lengdur um 18 sentimetra og 13 í seinna.

Aðgerðirnar voru mjög sársaukafullar og var Helgi til dæmis hengdur upp á nóttunni, of sársaukafullt var að liggja alla nóttina. Spítalinn í Kurgan sérhæfði sig í þessum aðgerðum og voru fjöldi barna frá ýmsum Evrópuríkjum þar, þar á meðal 19 ára íslensk stúlka, Valgerður Hansdóttir.