Sumarið 1979 var á sjöunda tug kílóa af dínamít-sprengiefni og 150 hvellhettum stolið úr skemmu fyrirtækisins Léttsteypunnar í Reykjahlíð við Mývatn en Léttsteypan sérhæfði sig í framleiðslu hleðslusteina og veghellna.

Þann 14. september sama ár var bóndinn á Grímsstöðum að smala í landi sínu þegar hann rakst á þýfið í hraungjótu við gamalt tófugreni. Hann hringdi samstundis í lögregluna á Húsavík sem mætti á svæðið.

Tryggvi Kristvinsson yfirlögreglumaður sagði brúnaþungur við Vísi: „Við vitum enn ekki hvort þetta er dínamítið, sem stolið var. Og við vitum enn ekki hvort hér sé allt sprengiefnið fundið en það er mest um vert, að þetta sprengiefni fannst, því það er mjög hættulegt hvort sem það er í höndum óvita eða illvirkja.“ Rannsókn málsins hélt áfram en ekki var upplýst hvort þjófurinn fannst.