Hljómsveitin Á móti sól gaf í vikunni út nýtt lag, Salt, en síðasta lag frá þeim kom út árið 2016.
Söngvari sveitarinnar, Magni Ásgeirsson, á lagið og Sævar Sigurgeirsson texta. Haffi Tempó sá um upptökur og hljóðblöndun, Ármann Einarssson saxafónleik og Pétur Örn Guðmundsson raddir.
„Lagið er óður til gamalla tíma, létt og algjörlega laust við að taka sig of alvarlega,“ segja strákarnir, en takturinn minnir á bresku sveitina Madness, sem vinsælust var á níunda áratugnum.
Framundan hjá Á móti sól eru tónleikar í Bæjarbíói Hafnarfirði 8. febrúar og ball ásamt Skítamóral í Hlégarði Mosfellsbæ 9. febrúar.