Nú fer hver að verða síðastur til þess að heimsækja myndlistarsýninguna Stórval í 110 ár í Menningarhúsinu Hofi á Akureyri. Opnun sýningarinnar fór fram þann 24.júní en þá voru 110 ár liðin frá fæðingu Stefáns V. Jónssonar frá Möðrudal, betur þekktum undir listamannsnafninu Stórval.
Stefán var einstakur maður og í myndlistinni var hann þekktur fyrir sérstakan og naívískan stíl. Uppáhaldsviðfangsefnið hans var fjallið Herðubreið.
Sýningin, sem hluti er af Listasumri á Akureyri, er haldin af Tinnu Stefánsdóttur langafabarni Stefáns í samstarfi við Menningarfélag Akureyrar og er styrkt af Menningarsjóði Akureyrar. Verkin á sýningunni eru flest í eigu afkomenda Stefáns sem jafnframt eru aðstandendur sýningarinnar en hún stendur yfir til 25.ágúst og er opin alla daga í sumar.
Fimmtudaginn 9.ágúst kl. 20 verður svo heimildarmyndin ,,Ég er nefnilega svo aldeilis yfirgengilega magnaður að lifa“ sýnd í Hömrum í Menningarhúsinu Hofi. Heimildarmyndina gerði Egill Eðvarðsson árið 1995 um síðustu einkasýningu Stóvals sem hann hélt austur á Vopnafirði með pompi og prakt. Heimildarmyndin er um 45 mínútur að lengd og er eitthvað sem enginn má láta fram hjá sér fara. Allir velkomnir og aðgangur ókeypis.
