Vinirnir Davíð Fannar, Róbert Laxdal og Andrés Kári gáfu nýlega út lagið Banka$træti.

Þeir eru allir aldir upp í Mosfellsbæ og hafa þekkst síðan þeir hófu grunnskólagöngu.

„Tónlist hefur alltaf verið okkur ofarlega í huga og höfum við prjónað okkar áhugamál í gegnum tíðina í samræmi við tónlist,“ segir Andrés Kári.

„Við byrjuðum að vinna saman snemma árs 2018 og fannst okkur auðvelt og skemmtilegt að vinna saman. Það hafði mikil áhrif á ástríðu mína þegar ég fór í sex mánaða nám til Danmerkur, þar sem ég lærði raftónlist og fleira.“

Róbert og Davíð kláruðu framhaldsskólanám við Verzlunarskólann en hafa mikið verið að vinna í tónlist með námi. Andrés Kári segir þá vinina með mörg verkefni í vinnslu og „vonandi er lagið Bankastræti bara upphafið að okkar ferli.“

„Lagið gerðist skemmtilega á einum degi með því að Davíð sendi Róberti undirspilið að Bankastræti og hittumst við allir seinna það kvöld og með því varð þetta yndislega lag til. Við erum spenntir að sjá hvað framtíðin hefur að bjóða fyrir okkur.“