Sunnudaginn 8. júlí kl. 17 í Akureyrarkirkju koma fram margir af bestu söngvurum landsins, bæði á sviði snemmtónlistar, nútímatónlistar og óperu, en þeir skipa átta radda sönghóp sem heitir Cantoque Ensemble.
Cantoque Ensemble er því eini atvinnukór landsins sem ekki tengist Íslensku óperunni. Söngvararnir eru Hallveig Rúnarsdóttir, Þórunn Vala Valdimarsdóttir, Hildigunnur Einarsdóttir, Lilja Dögg Gunnarsdóttir, Eyjólfur Eyjólfsson, Þorkell Helgi Sigfússon, Fjölnir Ólafsson og Hafsteinn Þórólfsson.
Meðlimir hópsins hafa margir hverjir sungið hlutverk á sviði Íslensku óperunnar og víðar, sungið með hljómsveitum víða um heim og hlotið ótvíræðar viðurkenningar fyrir söng sinn. Allir söngvarar hópsins eru virkir á konsertsviðinu auk þess sem þau syngja mikið saman við hverskyns tækifæri og eiga því auðvelt með að ná samhljómi.
Tónleikarnir nefnast Þjóðlög í þjóðleið og þar tekst kórinn á við útsetningar á íslenskum þjóðlögum, bæði nýjar og gamlar. Frumfluttar verða útsetningar eftir Hafstein Þórólfsson og Hildigunni Rúnarsdóttur. Aðgangur er ókeypis og allir hjartanlega velkomnir.