Tónleikaferðin hefur yfirskriftina Þjóðlög í þjóðleið og inniheldur a capella þjóðlagaútsetningar eftir íslensk tónskáld, bæði mörg þau þekktustu og einnig af yngri kynslóðinni. Þar af eru útsetningar eftir tvo meðlimi hópsins.
Hópurinn mun koma fram á Þjóðlagahátíðinni á Siglufirði 7. júlí kl. 17, á Sumartónleikum í Akureyrarkirkju 8. júlí kl. 17, á Sumartónleikum í Stykkishólmskirkju 9. júlí kl. 20 og að lokum á Sönghátíð í Hafnarborg þann 10. júlí kl. 20.
Cantoque Ensemble er 8 radda sönghópur, starfræktur á Íslandi. Hann inniheldur marga af bestu söngvurum landsins, bæði á sviði snemmtónlistar, nútímatónlistar og óperu. Hópurinn hefur vakið mikla athygli frá stofnun og hlaut tilnefningu til Íslensku tónlistarverðlaunanna árið 2017 fyrir tónleikana Purcell í Norrænu ljósi.
Eftir tónleikaferðina heldur Cantoque Ensemble svo í Skálholt þar sem hann mun vinna með hinum virta barokk-stjórnanda Andreas Spering í samvinnu við Bach-sveitina í Skálholti. Tónleikarnir sem bera yfirskriftina Um veröld og trúartraust verða laugardaginn 14. júlí kl. 16 og sunnudaginn 15. júlí kl.14.
