Nýtt listaverk, heimskort, Söguhrings kvenna var afhjúpað með pompi og prakt síðastliðinn sunnudag á Listahátíð í Reykjavík.

Konurnar kynntu sig og fjölluðu um táknin sem þær hafa verið að nota og að lokum var gestum og gangandi boðið að prófa punktamálunina. Fallegt listaverk og vel heppnuð sýning.

Söguhringur kvenna er samvinnuverkefni Borgarbókasafns Reykjavíkur og W.O.M.E.N. á Íslandi. Söguhringurinn er vettvangur fyrir konur til að skiptast á sögum, segja frá reynslu sinni og menningarheimi og vera hluti af skapandi umhverfi. Félagsskapurinn er opinn öllum konum sem langar að hitta aðrar konur, deila hugmyndum og ekki síst njóta samvista í afslöppuðu andrúmslofti. Söguhringurinn er kjörinn staður til tungumálaæfinga fyrir þær sem vilja ná betri tökum á íslensku. Allar konur velkomnar.

Hægt er að fylgjast með á Facebook, þar sem er bæði hópur og likesíða.

Markmið með söguhringnum er að:

• styrkja tengsl kvenna á Íslandi
• skapa vettvang þar sem konur geta skipst á sögum, hvort sem er persónulegum eða bókmenntalegum
• nota listræna sköpun til að stuðla að félagslegum tengslum milli kvenna
• skapa skilyrði fyrir frjálslega samveru þar sem konur geta deilt menningarlegum bakgrunni sínum gegnum frásögn, tónlist, texta, dans, matseld, kvikmyndir og fleira
• styrkja erlendar konur til að tjá sig um ýmis málefni á íslensku
• styrkja virðingu fyrir mismunandi menningarheimum

Annað sem söguhringurinn býður upp á er að:

• fara saman á menningarviðburði
• fara út í náttúruna

Myndirnar eru af Facebooksíðu Borgarbókasafnsins og skoða má fleiri myndir hér.