Laumulistamaðurinn Banksy hefur opnað hótel við aðskilnaðarmúrinn á Vesturbakkanum í Palestínu
Þekktasti laumulistamaður heims Banksy hefur opnað 10 herbergja hótel í Betlehem á vesturbakkanum í Palestínu. Hótelið, sem er allt í senn gistiheimili, listasafn, innsetning og pólitískur mótmælagjörningur, er staðsett fyrir neðan umdeildan 650 kílómetra múr sem skilur að landsvæði Palestínumanna og landnemabyggðir Ísraela á vesturbakkanum. Gluggar allra herbergjanna snúa út að múrnum, en listamaðurinn segir raunar að ekkert hótel í heiminum hafi verra útsýni en þetta. Hótelið er uppfullt af listaverkum eftir Banksy og er innvolsið sagt vísa á dystópískan hátt í nýlendusögu svæðisins.
Banksy vakti upphaflega athygli fyrir snjöll og gagnrýnin götulistaverk en hefur í auknum mæli verið að færa sig í pólitísk konseptlistaverk á mun stærri skala. Fyrir tveimur árum opnaði hann til að mynda skemmtigarð í Bretlandi. Tækin og listaverkin í garðinum voru notuð til að deila á viðbrögð Evrópu við flóttamannastraumnum, gagnrýna lögregluofbeldi og stríð.
