„Við erum að mótmæla þessu veðri em er búið að vera hérna í heilt ár liggur við. Bara, burt með þessi ský“ hrópaði æstur mótmælandi fyrir utan Veðurstofu Íslands. Hópur einstaklinga safnaðist saman fyrir utan húsnæði Veðurstofunnar í gær til að mótmæla arfaslöku veðri á suðvesturhorninu það sem af er sumri.
Meðlimir leikhópsins hafa hrundið af stað undirskriftasöfnun þar sem krafist er betra veðurs en DV greindi frá þessu uppátæki hópsins á dögunum og vakti fréttin mikla lukku.
„Við höfum fengið okkur fullsödd af þessu skítaveðri sem vaðið hefur uppi á suður og vesturlandi! Við krefjumst þess að nú verði tekið á málunum í eitt skipti fyrir öll og yfirvöld beiti þeim brögðum sem til þarf til að auka sólarstundir og velsæld þegnanna á þessum svæðum,“
segir í yfirlýsingu hópsins en ljóst er meðlimum er mikið niðri fyrir. Það ætti að vera öllum ljóst að hópurinn sé með þessu að slá á létta strengi en í yfirlýsingu var þess krafist að yfirvöld mættu kröfum hópsins eða greiddu fyrir þau flug til Egilsstaða „þar sem nýr höfuðstaður Íslands rís í sólbjörtu austrinu.“
Guðmundur Ingi Guðbrandsson, umhverfis- og auðlindarráðherra, slær einnig á létta strengi í nýlegri færslu á Facebook síðu sinni og lofar að setja saman drög að aðgerðaáætlun um nauðsynlega reglugerðarbreytingu svo innleiða megi sólskin á Suður- og Vesturlandi – og hægt verði að tryggja landsmönnum öllum sól í júlí. Þá bætir hann við að hann vænti einnig niðurstöðu starfshóps í September.
Meðfylgjandi myndskeið var tekið í gær þegar meðlimir hópsins komu saman fyrir utan Veðurstofu Íslands en líkt og sjá má var þeim heitt í hamsi.
„Það hefur ekki verið sól síðan í apríl! Meiri sól!,“ hrópaði einn úr hópnum. Hópurinn hélt á mómælaskiltum þar sem búið var að rita setningar á borð við: „HVER VEÐUR UPPI Á VEÐURSTOFUNNI?“ og „Skýlaust Ísland!“
Hópurinn beindi síðan mótmælum sínum til starfsfólks Veðurstofunnar og hrópuðu í sífellu: „Meiri sól! Meiri sól!,“
Ekki fylgir sögunni hver viðbrögð Veðurstofunnar voru við þessari óvæntu heimsókn.