Skagamaðurinn og knattspyrnuhetjan Ólafur Þórðarson hefur verið mikið milli tannanna á fólki eftir viðtal sem birtist í þættinum Návígi á fótbolti.net. Þar gagnrýndi hann þjóðfélagið harkalega, sagði að það væri verið að „kellingavæða allt saman“, „femínisminn væri orðinn allsráðandi“ og verið væri að „rítalíndópa börn frá unga aldri.“ Olli þetta miklum úlfaþyt á samfélagsmiðlum og margir sögðu viðhorf Ólafs gamaldags og fordómafull en flestir sem til þekkja í knattspyrnuheiminum og þekkja Ólaf hafa varið hann. Ólafur sér ummælin hins vegar ekki þar sem hann er ekki sjálfur á samfélagsmiðlum.
Móðir Ólafs, Ester Teitsdóttir, er 85 ára gömul Skagamær og eldhress. Hún segir:
„Ólafur var ósköp jafnlyndur greyið og alltaf kátur.“
Hvernig var hann sem barn?
„Hann var mjög athafnasamur sem barn. Við áttum heima á Sóleyjargötunni á Akranesi og þar fyrir framan er stórt tún sem er kallað Merkurtún. Þar var allur skarinn af Skaganum að leika sér í fótbolta og allra handa leikjum og Ólafur var þar mikið. Ég kallaði á hann í mat og svo var farið út aftur og leikið sér fram á kvöld. Það var ekkert hangið í tölvum, en þær voru reyndar ekki til þá,“ segir Ester og hlær.
En þegar hann varð eldri?
„Hann var tekinn í vinnu og látinn hjálpa til. Pabbi hans var með bílaútgerð og Ólafur var látinn bera pakka og annað sem þurfti að gera þar.“