Nýjasti þátturinn um Simpson-fjölskylduna svarar fyrir gagnrýni um að persónan Apu Nahasapeemapetilon sé rasísk staðalmynd. Indverski kaupmaðurinn Apu var umfjöllunarefni heimildarmyndar grínistans Hari Kondabolu, The Problem With Apu, þar sem fullyrt er að persónan sé uppfull af neikvæðum staðalmyndum um Indverja og hafi valdið Indverjum í Bandaríkjunum miklum skaða þar sem Apu var eina indverska persónan í bandarísku sjónvarpi í áraraðir. Í myndinni eru viðtöl við fjölmarga Bandaríkjamenn af indverskum og suður-asískum ættum sem hafa verið kallaðir „Apu“ og fengið að heyra ófáa frasa sem Apu hefur sagt í teiknimyndaþáttunum vinsælu.

Í Simpson-þættinum No Good Read Goes Unpunished sem frumsýndur var í Bandaríkjunum á sunnudagskvöldið er gagnrýninni svarað óbeint. Þar er atriði þar sem Marge Simpson er að lesa bók fyrir dóttur sína Lísu fyrir svefninn. Marge reynir þá að aðlaga innihald bókarinnar að nútímanum. Þá snýr Lísa sér að áhorfendum og segir:

„Þetta er eitthvað sem byrjað var á fyrir mörgum áratugum og var hampað á sínum tíma en passar ekki inn í rétttrúnað dagsins í dag. Hvað er hægt að gera?“

Lisa snýr sér þá að mynd af Apu, þá segir móðir hennar:

„Suma hluti þarf að glíma við síðar.“

Þá segir Lísa: „Eða ekki.“

Kondabolu var greinilega að horfa á þáttinn og sagði á Twitter:

„Vá. Pólitískur rétttrúnaður? Eru það skilaboðin sem myndin mín og umræðan skiluðu? Ég elskaði þessa þætti en þetta er sorglegt.“