Priscilla Presley hefur sagt skilið við Vísindakirkjuna eftir að hafa verið þar meðlimur í fjóra áratugi. „Ég hef fengið nóg. Ég er hætt,“ sagði hin 72 ára gamla Priscilla við vini sína. Að sögn kynntist Priscilla störfum Vísindakirkjunnar eftir lát fyrrverandi eiginmanns síns Elvis Presley, og gerðist meðlimur eftir hvatningu John Travolta. Hún ól dóttur þeirra Elvis, Lisu Marie, upp í anda kenninga Vísindakirkjunnar. Lisa Marie sagði skilið við Vísindakirkjuna árið 2014 og sagði: „Ég var smám saman að tortíma sjálfri mér. Þeir voru að taka sál mína, peningana mína, allt sem ég átti.“

Frægar stjörnur hafa á liðnum árum yfirgefið Vísindakirkjuna, þar á meðal Nicole Kidman og Katie Holmes, fyrrverandi eiginkonur Toms Cruise, en hann segir kirkjuna hafa bjargað sér. Leikkonan Demi Moore og kvikmyndaframleiðandinn Paul Haggis eru einnig meðal þeirra sem sagt hafa skilið við Vísindakirkjuna. Haggis segir að fræga fólkið yfirgefi kirkjuna hljóðlega því það sé dauðhrætt.

Þeir einstaklingar sem gerast meðlimir Vísindakirkjunnar þurfa að fara í gegnum próf þar sem spurt er mjög persónulegra spurninga um einkalíf þeirra. Því hefur verið haldið fram að viðkvæmar upplýsingar úr þessum prófum séu jafnvel notaðar til að kúga viðkomandi til að halda tryggð við kirkjuna.