Hamingja Íslendinga í skemmtilegum búningi
Vinkonurnar Heiðrún Ólafsdóttir og Hrefna Guðmundsdóttir gáfu nýlega út bókina „Why Are Icelanders So Happy?“, þar sem þær setja fram á léttan og skemmtilegan hátt hvað það er sem gerir okkur að þriðju hamingjusömustu þjóð í heimi. Bókinni er beint að ferðamönnunum sem sækja landið heim, en hún á þó erindi við okkur öll, því hvað er betra en að kynna sér hamingjuna og auka hana með öllum ráðum.
„Hrefna kom með hugmyndina að bókinni og við fórum að skoða hvað það er sem gerir okkur svona hamingjusöm og ákváðum að færa það til ferðamannanna sem hingað koma,“ segir Heiðrún, en ekki leið langur tími frá því að hugmyndin fæddist og þar til bókin var tilbúin. „Þetta gerðist mjög hratt, enda var hugmyndin góð.“
Hrefna er félagssálfræðingur og er búin að kynna sér hamingjuna í nokkur ár, bæði í jákvæðri sálfræði og hamingjufræðum, auk þess sem hún hefur haldið úti vefsíðunni hamingjuvisir.is um nokkurra ára skeið. Hrefna tók því að sér fræðilega hlutann, en Heiðrún, sem starfar sem rithöfundur og þýðandi tók að sér textann. Heiðrún vinnur nú að þýðingu erlendrar skáldsögu og er að leggja lokahönd á eigin ljóðabók sem væntanleg er í haust, en áður hefur hún sent frá sér eina skáldsögu og nokkrar ljóðabækur.
„Hugsaðu minna, lifðu meira“ – Guðbjörg, 48 ára
„Það var einhver sem sagði að við værum kannski svona hamingjusöm af því að við værum svo lygin. Við byggjum hins vegar bókina á niðurstöðum hamingjurannsókna sem við höfum skorað hátt í undanfarin ár og förum aðeins í gegnum hvað það er sem gerir okkur hamingjusöm og af hverju við erum svona hamingjusöm. Hvað gerir það að verkum að við skorum svona hátt í þessum rannsóknum. Við setjum upplýsingarnar fram á léttan og skemmtilegan hátt,“ segir Heiðrún og bætir við að Íslendingar hafi tekið bókinni mjög vel. „Bókin á að höfða bæði til útlendinga og Íslendinga þó að hún sé skrifuð á ensku og meginmarkhópurinn sé ferðamenn. Það má segja að Gullfoss og Geysir hafi náð sínum hápunkti, heimurinn þolir aðeins ákveðið mikið af því. Við erum í öðrum pælingum, við erum svolítið spes þjóð. Ferðamenn sem koma hingað nefna oft fólkið og andann sem svífur yfir vötnum,“ segir Heiðrún.
Í bókinni má finna ráð frá nokkrum álitsgjöfum sem allir koma úr innsta hring Heiðrúnar og Hrefnu, eins og til dæmis faðir Heiðrúnar, Ólafur Sveinsson, þjónn og fjallagarpur, sem fagnaði sjötugsafmæli sínu í fyrra. „Það gildir í þessu eins og mörgu öðru að hafa skal það sem hendi er næst,“ segir Heiðrún. „Við tölum við sérfræðinga í hamingjunni, en eins og við segjum í bókinni þá eru þeir skilgreindir sem venjulegir Íslendingar.“
Álitsgjafarnir eru af báðum kynjum, á aldrinum 14 til 93 ára, búa bæði í sveit og borg og í bókinni má finna tilvitnanir frá þeim um í hverju hamingjan er fólgin.
Vinir skipta okkur miklu máli eins og sjá má af tveimur tilvitnunum álitsgjafa: „Ég er hamingjusamur þegar ég er með vinum mínum,“ segir Arnaldur, 14 ára, og „Ég er hamingjusöm þegar ég hugsa um vini mína,“ segir Margrét, 93 ára.
Í bókinni sem fæst í helstu bóka- og ferðamannabúðum má meðal annars finna hamingjuaukandi æfingar. „Við viljum setja fræðin í samhengi við daglegt líf því það eru venjulegir Íslendingar sem svara þessum spurningum, þess vegna fáum við þetta háa skor. Við viljum vera upplýsandi, skemmtilegar og gefa fólki tækifæri á að auka eigin hamingju með léttum æfingum.“
