Fókus

Allt í sóma sigurvegari

Úrslit liggja fyrir í stóru Lukku-Láka keppninni – Kemur sérfræðingi á óvart

Ritstjórn DV skrifar
Þriðjudaginn 11. apríl 2017 15:20

Úrslit liggja nú fyrir í keppninni um bestu Lukku-Láka bókina sem gefin hefur verið út á íslensku. Eins og greint var frá í DV í síðustu viku stóð Stefán Pálsson, teiknimyndasöguáhugamaður með meiru, fyrir kosningunni á Twitter-síðu sinni. Niðurstaðan varð ótvíræð, bókin Allt í sóma í Oklahóma sigraði með yfirburðum, fékk 72 prósent atkvæða á meðan Rex og pex í Mexíkó hlaut aðeins 28 prósent. 131 greiddi atkvæði.

Sverri Örn Björnsson er líklega hvað fróðastur Íslendinga þegar kemur að Lukku-Láka. Sverrir Örn hefur þannig skrifað nokkuð ítarlegar færslur um allar þær Lukku-Láka bækur sem út hafa komið á íslensku á Wikipediu-alfræðisíðuna og einnig um fjölda annarra bóka í flokknum sem ekki hafa verið þýddar. „Þetta kom svolítið á óvart en ég svo sem kann engar skýringar á velgengni þessarar bókar, aðrar en þá kannski að hún er ein af fyrstu bókunum sem gefin var út á íslensku. Hún var sú þriðja í röðinni og það er kannski þannig að hún hafi fengið stuðning af ákveðinni nostalgíu. Hún hefur nú ekki verið talin í hópi þeirra allra bestu, svona almennt.“

Sverrir Örn segir að sjálfur hafi hann kosið Rex og pex í Mexíkó. Ef hann hefði hins vegar fengið að ráða hefði Apasagjáin staðið uppi sem sigurvegari. „Það er nú svona mín uppáhaldsbók en hún féll bara út í fyrstu atrennu.“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af