Fókus

Sonur Eastwood fékk ekkert upp í hendurnar

Kolbrún Bergþórsdóttir skrifar
Sunnudaginn 9. apríl 2017 20:00

Scott Eastwood, sonur Clints Eastwood, fæddist kannski með silfurskeið í munninum en hefur þó sannarlega þurft að vinna fyrir salti í grautinn. „Pabbi gaf mér aldrei krónu. Hann lét mig vinna fyrir mínu,“ segir hann. Scott er einn af sjö börnum Clints og vinnur fyrir sér sem leikari. Hann segir að í Hollywood hafi hann til að byrja með ekki verið tekinn alvarlega. „Ég er afgreiddur með orðunum: Þú ert sonur Clints Eastwood, þú ert enginn andskotans leikari. Sumir líta enn þannig á. Ég hélt aldrei að ég myndi endast í þessum bransa en nú er mér farið að ganga allt í haginn.“

Nýjasta mynd Scott er Fast and Furious 8, en þar fetar hann í fótspor vinar síns, Paul Walker heitins sem varð stjarna fyrir leik sinn í Fast and Furious-myndunum og lést árið 2013 í bílslysi, fertugur að aldri. Þeir Paul voru vinir í 15 ár og þegar Scott var boðið hlutverkið í Fast and Furious 8 hikaði hann við að taka boðinu. „Því meir sem ég hugsaði um það því sterkari var hugsunin um að Paul fylgdist með mér og segði: Ekki vera idjót, sláðu til.“ Scott segir að við tökur á myndinni hafi honum stundum fundist eins og Paul væri nálægur og þá átt bágt með að halda aftur að tárunum.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af