Pizzur eru farnar að leika stórt hlutverk í nýsköpun listakokksins heimsfræga, Jamies Oliver, en pizzur rötuðu fyrst á matseðla hans fyrir örfáum árum. Á Jamie’s Italian á Hótel Borg, sem var opnaður um mitt síðasta sumar, eru pizzur ásamt pasta vinsælustu réttirnir. Jón Haukur Baldvinsson, framkvæmdastjóri Jamie’s Italian á Íslandi, fræðir okkur örlítið um stutta en glæsta sögu pizzugerðar hjá Jamie Oliver:
„Jamie’s Italian-staðirnir hófu fyrst rekstur í Bretlandi árið 2009 en pizzur komust ekki á matseðilinn fyrr en nokkrum árum síðar, þess í stað einbeitti hann sér að pasta og öðrum hefðbundnum ítölskum réttum, til dæmis sinni útgáfu af steikum að ítölskum sið. Á Englandi eru aðeins þrír Jamie’s Italian-staðir með pizzur en markmiðið er að allir staðirnir verði með pizzur innan skamms enda vinsældirnar það miklar. Pizzurnar hafa hins vegar slegið svo rækilega í gegn að núna er orðin til ný Jamie Oliver keðja, Jamie’s Pizzeria.“
Að sögn Jóns Hauks var ekki borðleggjandi að pizzur yrðu á nýja staðnum á Hótel Borg en íslensku rekstraraðilarnir vissu hvað pizzur eru vinsælar á Íslandi og lögðu þunga áherslu á að þær yrðu á matseðlinum. Sem er eins gott því að sögn Jóns Hauks eru pizzur og pastaréttir vinsælustu réttirnir á Jamie’s Italian á Hótel Borg. Jón Haukur segir okkur dálítið frá þessum pizzum sem renna svo ljúflega niður í landann og erlenda ferðamenn:
„Þetta eru súrdeigspizzur og mikið af hráefninu sem við notum kemur beint frá Ítalíu, til dæmis hráskinkan, pylsur, ólífur og fleira. Þessu blandast íslenskt gæðahráefni, sérstaklega ostur, en hinn dýrlegi Búri er helsti osturinn sem notaður er á pizzurnar. Ein vinsælasta pizzan heitir „The Porkie“ en á henni er svínakjöt, svokallað pancetta, sem er ítölsk útgáfa af beikoni, pepperóní, Búra-ostur og oreganó ásamt fleira góðgæti. „The Funghi“ er síðan afar vinsæl villisveppapizza með sveppasósu, ristuðum villisveppum og Búra. Þá má nefna „Red Rocket“ sem er meðal annars með Búra-ostinum og ekta Prosciutto.“
Að sögn Jóns Hauks eru pizzurnar gífurlega vinsælar hjá öllum aldurshópum og á öllum tímum dags, jafnt hjá vinnandi fólki í hádegismat sem fjölskyldum að lyfta sér upp á kvöldin eða um helgar.
Sem fyrr segir var Jamie’s Italian á Hótel Borg opnaður síðasta sumar og að sögn Jóns Hauks er aðsóknin mjög góð. Erlendir ferðamenn eru vissulega áberandi en íslenskir matargestir eru samt í greinilegum meirihluta og hafa vinsældir staðarins meðal Íslendinga farið fram úr björtustu vonum.
Sjá nánar á vefsíðunni jamiesitalian.is.
