Kraftlyftingamaðurinn og leikarinn Hafþór Júlíus Björnsson mun brátt stækka við sig og opna glænýja líkamsræktarstöð á Dalvegi í Kópavogi. Þetta staðfestir Hafþór Júlíus í stuttu samtali við blaðamann DV. Hafþór Júlíus, sem gjarnan er kallaður Fjallið, hefur undanfarin ár rekið Thors Power Gym í húsnæði við Auðbrekku 2 í Kópavogi en starfsemin hefur sprengt húsnæðið utan af sér og því er flutningur innan bæjarfélagsins yfirvofandi. Fjallið er með mörg önnur járn í eldinum. Framundan er frumsýning á lokaþáttaröð Game of Thrones þar sem hann fer með mikilvægt hlutverk Gregors „The Mountain“ Clegane. Þá var nýlega greint frá því að hann hefði hótað tveimur konum lögsókn fyrir að dreifa um hann sögusögnum um meint heimilisofbeldi.