Það er engum ofsögum sagt að lítið góðverk geti dimmu í dagsljós breytt og mörg mættum við ef til vill vera örlítið jákvæðari og tillitsamari í garð náungans.
Ein lítil færsla á Facebook sýnir að samtakamáttur fólks getur verið mikill. Þannig er mál með vexti að Guðlaug Hrönn nokkur, kona á besta aldri, setti inn auglýsingu í Facebook-hópinn Vinna með litlum fyrirvara í gær.
Þar sagði hún frá því að hún hefði auglýst sófasett gefins á þar til gerðri Facebook-síðu. Sagði Guðlaug að flóttamaður frá Palestínu hefði gjarnan viljað fá það. Sjálf er hún búsett í Grafarvogi en hann í Hafnarfirði og þar sem hann var ekki með afnot af bíl – og hún á bíl sem sófasettið komst ekki í – voru góð ráð dýr.
„Dettur ykkur í hug einhver leið til að koma því til hans, t.d. einhver sem keyrir þessa leið og gæti tekið þetta með í ferðinni eða gegn mjög sanngjarnri greiðslu?“
Viðbrögðin við færslunni létu ekki á sér standa og voru margir sem buðust til að hjálpa. „Ég er til í að leggja í púkk fyrir flutningabíl,“ sagði ein kona, Pálína að nafni. Guðlaug svaraði að bragði að hún væri komin með tilboð upp á sex þúsund krónur og svaraði Pálína að bragði að hún væri tilbúin að borga helminginn af því. Fleiri bættust í hópinn og sögðust tilbúnir að leggja sitt af mörkum.
Miðað við umræðurnar er líklegt að maðurinn hafi fengið sófasettið með aðstoð góðra netverja sem þekktu hann ekki neitt.