Atli Rúnar plötusnúður og viðburðafyrirtæki hans, ARG viðburðir, heldur Aldamóta-tónleika 26. apríl í Háskólabíói.
Þar mun landslið poppara koma fram: Birgitta Haukdal, Einar Ágúst, Gunni Óla, Hreimur og Magni.
Öll eiga þau það sameiginlegt að hafa verið í hljómsveitum sem voru gríðarlega vinsælar og virkar í kringum síðustu aldarmót. Og gott betur en það, því flest af þessum böndum eru ennþá í fullu fjöri og allir söngvararnir eru enn starfandi sem tónlistarfólk og til dæmi um það þá var Birgitta á meðal þeirra sem tilnefnd var sem söngkona ársins á Hlustendaverðlaununum 2019 sem haldin voru síðasta laugardag í Háskólabíói.
„Fannst þér gaman að fara á ball? Sástu Skímó á Broadway, Írafár á Gauknum, Á móti sól á Breiðinni eða Land og syni í Sjallanum? Langar þig að sjá og heyra lög með þessum böndum flutt live? Ef svarið er já við einhverjum af þessum spurningum ertu stálheppin/n,“ segir í viðburðinum á Facebook, en miðasala hefst kl. 13 fimmtudaginn 14. febrúar á tix.is/aldamot.
Tónleikarnir verða tvískiptir, fyrir hlé munu ballöðurnar og rólegu lögin verða flutt, en eftir hlé verður allt gert vitlaust og talið í hverja sprengjuna á fætur annarri.
„Okkur hjá ARG viðburðum fannst vanta svona tónleika. Það er orðið til kynslóð sem sótti sveitaböllin grimmt, en nennir ekkert endilega að fara lengur á sveitaböll, fyrir utan að sú dýrategund virðist hægt og rólega vera að deyja út. Svo rímar þetta líka vel við okkar stefnu, okkur finnst gaman að halda viðburði sem eru annað hvort öðruvísi (eins og Grease tónleikarnir og 90´s nostalgían) eða ekki tíðir líkt og Mannakorns tónleikarnir sem við erum einnig að halda í vor,“ segir Atli Rúnar. „Ég er að miða við 35/40 plús hópinn.“
Hljómsveitarstjóri verður hinn eini sanni Vignir úr Írafár og mun hann ásamt bestu hljóðfæraleikurum Íslands sjá til þess að allur flutningur verði upp á tíu. Kynnir kvöldsins kemur alla leið frá Tenerife og er best þekktur sem Svali á FM.