Leikarinn Björn Thors segir karlmenn á sínum aldri oft eiga við það vandamál að stríða að neita að fullorðnast. Þetta kemur fram í þættinum Bíóhornið en þar segir hann að hann sé gjarnan fastur í ákveðinni staðalmynd sem leikari og sé hlutverk hans í kvikmyndinni Vesalings elskendur engin undantekning.
Björn segir:
„Einhverra hluta vegna er þetta ekki í fyrsta skiptið sem ég fæ hlutverk manns sem á erfitt með að fullorðnast. Ég vil ekki meina að það sé líkt mér en það getur vel verið að það sé líkara mér en ég sjái sjálfur.“
Björn segir að þetta kallast á við hlutverk sem hann lék í París norðursins og Þetta reddast, svo dæmi séu tekin; „Karlar á mínum aldri eiga oft við þetta vandamál að stríða, en einhver ástæða er fyrir því að mér er kastað í rullurnar,“ bætir hann hressilega við.
Í kvikmyndinni leikur Björn hinn seinheppna Óskar, mann sem reynir að forðast náin sambönd og á til að forðast tilfinningaleg tengsl, sem í kjölfarið hefur töluverð áhrif á bæði einkalíf hans og samskipti við fjölskyldumeðlimi.
Vesalings elskendur er sænsk framleiðsla og er myndinni leikstýrt af Maximilian Hult, en Björn hrósar kvikmyndagerðarmanninum hástert. Þá segir hann að húmorinn í Svíþjóð sé af allt öðruvísi toga en á Íslandi.
„Kómíkin í handritinu er mjög fínleg,“ segir hann. „Að því leyti finnst mér leikstjórinn takast á við verkefnið aðeins öðruvísi en íslenskir kollegar hans myndu gera. Mér finnst íslenski húmorinn aðeins grófari, í raun „gróteskari.“ Við erum talsvert ofsafengnari í því hvernig við segjum sögur, sérstaklega kómískar sögur.“
Viðtalið má sjá í heild sinni í þættinum að neðan.