„Vendirnir frá Pastel eru allt annað en hefðbundnir. Blómin fá svolítið að stjórna ferðinni sjálf og við vinnum eftir tilfinningu. Litasamsetningarnar eru óvæntar og ólíkar því sem fólk er vant. Auk þess notum við þurrkuð, lituð blóm og blöndum þeim við önnur fersk, afskorin,“ segir Sigrún Guðmundsdóttir, annar helmingur tvíeykisins í blómastúdíóinu Pastel.
https://www.instagram.com/p/Btq0FN9AN_B/
Sigrún skipar stúdíóið með vinkonu sinni, Elínu Jóhannsdóttur, en þær stöllur halda sinn fyrsta pop-up viðburð í Granda Mathöll helgina 23. Til 24. febrúar næstkomandi.
„Pop-up markaðurinn er skemmtileg leið til að kynna okkur og vöruna okkar og hitta tilvonandi viðskiptavini. Okkur fannst Grandi Mathöll vera tilvalinn staður fyrir viðburðinn þar sem þau hafa búið til skemmtilega og lifandi markaðsstemningu,“ segir Sigrún, en þær Elín hafa áralanga reynslu í heimi tísku og hönnunar.
https://www.instagram.com/p/BtUKh8XgMbG/
„Hugmyndin að blómastúdíói hafði blundað lengi í okkur báðum. Við ákváðum síðasta haust að það væri ekki eftir neinu að bíða og byrjuðum prófa okkur áfram með mismunandi samsetningar. Elín lauk prófi í sjónmenningarfræði frá Kaupmannahafnarháskóla fyrir nokkrum árum, ásamt því að hafa starfað við tísku og verslunarstörf í fleiri ár. Ég hef bakgrunn í tísku, frá sölusýningum, við verslunarstjórnun og stofnaði og rak vefverslun með vintage fatnaði á meðan ég bjó í Berlín. Leiðir okkar lágu saman við verslunastörf fyrir nokkrum árum.“
Það er engin tilviljun að vinkonurnar í Pastel poppa upp í mathöllinni þessa helgi, þar sem konudagurinn er á sunnudag. En hvað einkennir hinn fullkomna konudagsvönd?
https://www.instagram.com/p/BslRmuUg9Ej/
„Fullkominn konudagsvöndur er gefinn af heilum hug,“ segir Sigrún og segir þær Elínu leggja mikla ástríðu í hvern vönd.
„Ætli blóm geti ekki endurspeglað flestar tilfinningar. Blóm eru táknmynd sköpunar og við reynum að endurspegla það í okkar handbragði. Hver og einn vöndur frá okkur hefur sinn eigin karakter og engir tveir eru eins.“
Þá liggur beinast við að spyrja hvað þær telji að sé vanmetnasta blómið?
https://www.instagram.com/p/BrOOE3WnjPn/
„Okkur finnast íslensku, villtu blómin oft vanmetin og langar mikið til að prófa okkur meira áfram með þau þegar fer að sumra,“ segir Sigrún. Eftir að pop-up markaðinum lýkur taka við spennandi tímar hjá Pastel.
„Við tökum að okkur fjölbreytt verkefni við skreytingar og innsetningar fyrir ólík tilefni og það er margt spennandi fram undan á næstu vikum sem við hlökkum til að sýna afraksturinn af. Auk þess erum við partur af skemmtilegu samstarfsverkefni á Hönnunarmars í lok næsta mánaðar.“
