„Ég kynnist honum seint en vissi alltaf af honum. Það var ekkert leyndamál í æsku hver væri pabbi minn og ég hitti hann oft þegar ég var yngri en hann var kannski ekki þá í sínu besta ásigkomulagi og var örugglega ekki tilbúinn til þess að tengjast okkur systkinunum.“ Þetta segir sjónvarpskonan Eva Laufey Kjaran Hermannsdóttir um samband sitt við föður sinn, Hermann Gunnarsson, eða Hemma Gunn. Hún ræðir þetta og annað í þættinum Einkalífið sem sýndur er á Stöð 2.

Hún kynntist ekki Hemma fyrr en hún var komin á unglingsaldur en þá náði hún að mynda sterkt samband við hann áður en hann lést árið 2013. „Þetta var ekkert alveg venjulegt fjölskyldulíf og svolítið flókið, ég viðurkenni það alveg. Ég kynntist honum vel þegar ég var orðin fullorðin en á unglingsárunum varð sambandið alltaf betra og betra og hann líka á miklu betri stað. Við kynntumst bara mjög vel og þetta var orðið að mjög góðu sambandi,“ segir Eva.

Hún segist þó mjög þakklát fyrir að hafa náð að kynnast honum. „Ég var svo þakklát fyrir það þegar hann dó að við höfðum átt svona góðan tíma saman og gott samband. Hann var byrjaður að hringja í mig og svona aðeins farinn að segja mér til og þá hugsaði ég að ég væri tvítug og þú getur ekki byrjað núna,“ segir Eva Laufey.

Hún segist hafa búið til sögur þegar hún var barn og spurð um föður sinn. „En það sem var kannski svo flókið þegar maður er lítill er að aðrir vita að þetta sé Hemmi Gunn og leit ekki á hann sem einhver Hemmi Gunn. Það var því flókið þegar allir krakkarnir í bekknum voru að spyrja mig hvað Hemmi gaf mér í gjöf og hvort ég væri ekki alltaf að fara í þáttinn til hans. Svo var ekki raunin og það var oft svolítið erfitt og ég man að ég stóð mig alveg að því, og hef örugglega ekki sagt neinum, að maður byrjaði að búa til sögur fyrir þau með gjafir og annað því að ég skildi ekkert af hverju þetta væri svona. Ég var kannski aðeins meðvirk með ástandinu,“ segir Eva Laufey.

Viðtalið í heild sinni má sjá hér.